Вялікая дэлегацыя артыстаў з устаноў культуры раёна у хуткім часе наведае Любаншчыну. Тут нашы таленты па запрашэнню арганізатараў прымуць удзел у занальным фестывалі “Грай, гармонік!”.

У пачатку верасня члены раённай арганізацыі БРСМ плануюць прыняць удзел у абласных дабрачынных акцыях “Кола агляду”, “Беларусь — наша родная зямля”. Пройдуць яны ў Гомелі.

На 450 гектарах сёлета ў КСУПе “Коленскае” размесцяцца пасевы азімага рапсу. На цяперашні час працаўнікі гаспадаркі актыўна вядуць сяўбу гэтай алейнай культуры.

На свята да суседзяў запрошаны народны ансамбль народнай песні “Сваты”. Самадзейныя артысты гэтага калектыва парадуюць сваімі выступленнямі жыхароў Лельчыц, якія на пачатку верасня будуць адзначаць свята свайго населенага пункта.

Гандаль таварамі для школьнікаў вядзецца зараз у магазінах Жыткавіцкага райспажыўтаварыства. Пачаўся ён яшчэ з пятнаццатага ліпеня.

Паралельна з абмалотам збажыны ў сельгаспрадпрыемствах ідзе і ўборка саломы. Ад яе ўжо вызвалены палеткі на плошчы амаль у пяць тысяч гектараў. У сцірты пакладзена каля сямі тысяч тон рулонаў саломы.

Трыццаць шэсць канцэртаў дадзены культработнікамі раёна на зернетаках і збожжавых палетках для хлебаробаў падчас сёлетняга жніва.

У мінулую нядзелю добра павесяліліся жыхары і шматлікія госці вёскі Пухавічы. Тут ладзілася свята Дня вёскі.

Раённыя конкурсы прафесійнага майстэрства сярод тэхнікаў-асемянатараў і аператараў машыннага даення будуць праведзены ў бліжэйшы час. Адбудуцца гэтыя мерапрыемствы на базе сельгаспрадпрыемстваў “Агра-Прыпяць” і “Коленскае”.

Корманарыхтоўшчыкі КСУПа “Коленскае” прыступілі да ўборкі кукурузы. Сёлета палеткі пад гэтай культурай тут займаюць тысячу гектараў.

На апошніх гектарах вядуць абмалот збажыны хлебаробы КСУПа “Бялёў”. А гэта значыць, што тут хутка адсвяткуюць Дажынкі.

Першы камбайнавы экіпаж — тысячнік з’явіўся падчас сёлетняга жніва на Жыткаўшчыне.