З пачаткам пашавага ўтрымання грамадскага статка жывёлаводы КСУПа “Бялёў” мяркуюць павялічыць вытворчасць малака

396З пачаткам пашавага ўтрымання грамадскага статка жывёлаводы КСУПа “Бялёў” мяркуюць павялічыць вытворчасць малака на сваіх фермах. Напрыканцы мінулага тыдня ў гэтай дзейнасці зроблены першы крок, калі выгналі дойных кароў на пашу.
— На цяперашні час справы з надоямі ў нас абстаяць не так добра, як летась, — расказвае галоўны заатэхнік гаспадаркі Антаніна Новікава. — “Мінусуем” і па валавому надою, і па продажу. Прычына гэтаму адна — недастае кармоў, таму і рацыёны жывёлы не такія багатыя як у мінулым годзе. Выходзіць стараемся з нялёгкай сітуацыі з дапамогай канцэнтратаў і шроту, якія пастаянна закупляем для грамадскай жывёлы. Але асноўныя нашы спадзяванні на вялікае малако звязаны з пасьбой дойнага статка.
Да пашавага перыяду ў гаспадарцы падрыхтаваліся грунтоўна: адрамантавалі бочкі і карыты для паення кароў, іншае абсталяванне, набылі электрапастухі, вырашылі пытанні з пастухамі, падкармілі мінеральнымі тукамі выпасы. Па словах Антаніны Аляксандраўны, вельмі добра, што гэта зрабілі, бо пашы не дастае і яе давядзецца скарыстоўваць вельмі рацыянальна, старанна даглядаць летам, каб яна давала належную аддачу. Акрамя травы, будуць каровам давацца і канцэнтраты.
Значныя надзеі на тое, што пацяжэе летам гаспадарчы надой, мясцовыя жывёлаводы звязваюць з увядзеннем пасля рэканструкцыі яшчэ адной фермы на дзвесце кароў. Пагалоўе ўжо для яе ў гаспадарцы маецца. Зараз тут будаўнікі падводзяць, як кажуць, апошнія штрыхі, каб летам аб’ект пачаў працаваць і даваць прадукцыю.
— Для нас увод у вытворчасць яшчэ адной фермы вельмі важны рэзерв, — адзначае галоўны заатэхнік. — Да таго ж на ёй будуць прымяняцца больш сучасныя тэхналогіі, што не толькі аблегчыць працу жывёлаводаў і станоўча паўплывае на колькасныя паказчыкі ў вытворчасці малака і дазволіць прадаваць яго самым высокім гатункам “экстра”.
Але самыя галоўныя надзеі на паляпшэнне спраў у малочнай галіне гаспадаркі спецыяліст звязвае з майстэрствам мясцовых аператараў машыннага даення, якія сваімі працоўнымі здабыткамі не раз даказвалі, што яны сапраўдныя прафесіяналы. У ліку такіх Жанна Матох, Галіна Рагалевіч, Людміла Загароўская, Жанна Козел, Раіса Струк, Вольга Паўлюшчыц, Наталля Жогаль і іншыя.
Кожны год жывёлаводы КСУПа “Бялёў” ў вытворчасці малака ўздымаюць вышэй планку сваіх здабыткаў. Летась на шкале грамадскіх надояў яна стаяла на адзнацы 5400 кілаграмаў малака ад каровы, сёлета перамясцілася на дзвесце кілаграмаў вышэй — да 5600. І хаця няпроста цяпер складваюцца на грамадскіх фермах справы, але ўсе стараюцца, каб намечанае было выканана.
Сяргей БЕЛКА.

Добавить комментарий

Ваш e-mail не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.