СНЕЖНАЕ ПОКРЫВА МОЖА МЕСЦАМІ СФАРМІРАВАЦЦА ДА ВЫХАДНЫХ У БЕЛАРУСІ

238Ёсць верагоднасць, што да канца бягучага тыдня ў Беларусі месцамі сфарміруецца снежнае покрыва, паведаміў начальнік службы гідраметэаралагічных прагнозаў Рэспубліканскага гідраметэацэнтра Дзмітрый Рабаў.

«У будныя дні бягучага тыдня амаль уся тэрыторыя Беларусі будзе знаходзіцца пад уплывам шырокага антыцыклону. У сувязі з паступленнем на тэрыторыю Беларусі арктычнага паветра тэмпературны фон на працягу тыдня будзе паступова паніжацца. Халадней за ўсё будзе па паўночным усходзе, крыху цяплей — па паўднёвым захадзе краіны», — сказаў Дзмітрый Рабаў.

У аўторак, 18 лістапада, будзе пераважна без ападкаў, толькі па паўднёвым захадзе месцамі пройдуць невялікія ападкі, у асноўным у выглядзе дажджу, прагназуецца слабы галалёд. Вецер чакаецца паўднёва-ўсходні 5-10 метраў у секунду, па паўднёвым захадзе — з парывамі да 14 метраў у секунду. Тэмпература паветра ўначы складзе ад мінус 3 да 3 градусаў цяпла, па паўночным усходзе пры праясненнях чакаецца да мінус 6 градусаў. Удзень будзе ад мінус 2 да плюс 4 градусаў.

«У наступныя дні ўзмоцніцца паступленне холаду з глыбіні кантынента за кошт усходніх вятроў», — адзначыў сіноптык. У сувязі з гэтым у сераду і чацвер (19-20 лістапада) тэмпература паветра ноччу будзе вар’іравацца ад мінус 5 да плюс 2 градусаў, па паўночным усходзе пры праясненнях чакаецца да мінус 7 градусаў, днём прагназуецца ад мінус 2 да 4 градусаў цяпла. У паўднёва-заходніх раёнах рэспублікі прагназуюцца ападкі ў выглядзе дажджу і мокрага снегу і слабы галалёд.

У пятніцу (21 лістапада) у заходніх раёнах рэспублікі сіноптыкі абяцаюць ападкі — мокры снег, дождж, а таксама слабы галалёд. Тэмпература паветра ўначы складзе ад мінус 5 да 2 градусаў вышэй за нуль, па ўсходзе пры праясненнях чакаецца мінус 6-8 градусаў, удзень — ад мінус 2 да 3 градусаў цяпла.

У выхадныя дні (22-23 лістапада) тэмпература паветра прадоўжыць паніжацца, паколькі праз тэрыторыю рэспублікі будзе праходзіць малаактыўны атмасферны фронт. «Ён прынясе месцамі кароткачасовы снег, мокры снег, слабы галалёд», — растлумачыў Дзмітрый Рабаў. Месцамі можа сфарміравацца снежнае покрыва. Тэмпература паветра ноччу складзе ад 0 да мінус 7 градусаў, пры праясненнях чакаецца мінус 8-10, днём — ад мінус 3 да плюс 2 градусаў.

Добавить комментарий

Ваш e-mail не будет опубликован.