Бяздоннае багацце возера Чырвонае, что на Жыткаўшчыне

земснаряд1Спецыялісты адкрытага акцыянернага таварыства “Жытка-вічыхімсервіс” распачалі сезон здабычы сапрапелю. Дзякуючы абнаўленню абсталявання, што дазволіла значна нарасціць магутнасці вытворчасці і ўдасканаліць тэхналагічныя працэсы, працаўнікі прадпрыемства збіраюцца сёлета намнога павялічыць вынікі вышэйзгаданай дзейнасці.
Участак па здабычы сапрапелю знаходзіцца непасрэдна на возеры Чырвонае. У гэтае структурнае падраздзяленне акцыянернага таварыства разам з яго дырэктарам Віктарам Атліванавым трыццатага сакавіка наведаліся старшыня райвыканкама Дзмітрый Гайкевіч і яго першы намеснік Мікалай П’яўко, каб азнаёміцца з пачаткам работ па намыванні каштоўнай сыравіны з аднаго з буйнейшых вадаёмаў палескага краю. Паварот з шашы за аграгарадком Дуброва, некалькі кіламетраў па грунтоўцы — і пачынаюцца накапляльнікі пульпы. Менавіта яны і сталі прычынай для першага прыпынку гасцей.
— Мы маем 47 чэкаў, якія размяшчаюцца на 102 гектарах. Многія з іх не выкарыстоўваліся, зараслі кустоўем і пустазеллем. Таму праведзена вялікая праца, каб прывесці ўсе накапляльнікі ў рабочы стан, — гаворыць Віктар Атліванаў. — Пры іх поўнай запаўняльнасці тут можна размясціць адначасова 100-120 тысяч тон сыравіны для атрымання сапрапелю.
Пасля такога каментарыю Віктар Адамавіч падаў сігнал на земснарад, і праз некалькі хвілін з трубаправода хлынулі першыя кубаметры чорна-рудой вадкасці. Для запаўнення ёю аднаго чэка спецыялістам вытворчага ўчастка спатрэбіцца два дні. Далей, калі вадкасць адстаіцца, большая частка вады будзе адведзена, а потым густую жыжу, падобную на багну, пакінуць сохнуць пад уздзеяннем прыродных фактараў. Калі яна ператворыцца ў сыпучую масу, яе будуць варушыць спецыяльнымі машынамі, аж пакуль сапрапель не дойдзе на патрэбнай кандыцыі. Перад тым, як прадукцыя, атрыманая з азёрнага дна, трапіць да спажыўцоў, яна пройдзе канчатковую дапрацоўку на базе забеспячэння акцыянернага таварыства.
Але пачынаецца гэты вытворчы ланцуг непасрэдна на возеры Чырвонае, з дна якога і здабываецца каштоўная сыравіна. У гэтым сезоне ўсё робіцца новым земснарадам італьянскай вытворчасці, які набыты прадпрыемствам за ўласныя сродкі.
— Патрацілі два з паловай мільярды рублёў, — расказвае пра сучасны набытак дырэктар. — Але аб фінансавых расходах ніколькі не шкадуем, бо атрымалі самую лепшую і высокапрадукцыйную тэхніку. Тым больш што грошы выручылі ад продажу металалому, які атрымалі са старога абсталявання. За гадзіну новы земснарад можа дастаць з азёррнага дна і перакачаць у чэкі да трохсот метраў кубічных пульпы. На цяперашні час гэтыя магутнасці скарыстоўваюцца пакуль на палову. Прычына ў тым, што ад месца здабычы і да месца накаплення сыравіны амаль паўтара кіламетра: 1200 метраў пульпаправода пракладзена па сушы і яшчэ больш за дзвесце — па вадзе, таму не дастае ціску ў трубах для пракачвання масы. Але праблема ў хуткім часе будзе вырашана, для чаго збудуем помпавую станцыю, якая і паскорыць дастаўку.
Адзначыў кіраўнік не толькі высокую прадукцыйнасць земснарада, але і яго эканамічнасць. У параўнанні са старым абсталяваннем новае спажывае электраэнергіі амаль у дзесяць разоў меней, пры гэтым здабываецца донных адкладанняў намнога болей. Ды і якасць працы намнога вышэйшая. Пульпа, якая здабывалася на старым земснарадзе, больш за дзевяноста працэнтаў складалася з вады і нязначнай часткі сапрапелю, цяпер жа ў ёй доля карыснага рэчыва да трыццаці працэнтаў.
Канечне, развіваючы здабычу і вытворчасць сапрапелю, кіраўніцтва акцыянернага таварыства, у першую чаргу, пралічвае эканамічную састаўную і будучыя перспектывы. Як, сведчыць практыка мінулых гадоў, з гэтым усё ў парадку. Скажам, што гадавая выручка ад рэалізацыі сапрапелю таварыствам у агульнай яе структуры складае трыццаць працэнтаў, пры даволі высокай рэнтабельнасці. Ёсць і пастаянныя надзейныя спажыўцы, у ліку якіх беларускія нафтавікі, бурыльшчыкі свідравін для здабычы вады, аграрыі, вытворцы камбікармоў. Менавіта яны раскупляюць для сваіх вытворчых патрэб за год амаль увесь сапрапель, што здабываецца працаўнікамі ААТ “Жыткавічыхімсервіс”. А гэта ні многа ні мала, а амаль трыццаць тысяч тон. Тысячу тон сапрапелю перапрацоўваюць непасрэдна на базе таварыства, з якога вырабляюць дзевяць відаў грунтоў. Шчодра ўгнойваюць ім і свае палеткі. Самае ж галоўнае, што попыт на сапрапель расце ва ўсім свеце, таму, будзем спадзявацца: у працаўнікоў “Жыткавічыхімсервіса” знойдуцца партнёры і за мяжой.
Кіраўніцтва прадпрыемства, распрацоў-ваючы донныя багацці на возеры Чырвонае, разглядае гэтую справу не толькі як камерцыйны праект, але яшчэ і як экалагічны. Дзякуючы рабоце спецыялістаў арганізацыі вадаём ачышчаецца ад забагвання. Таму невыпадкова, што акцыянернае таварыства стала ўладальнікам гранта па праекту садзейнічання пераходу Рэспублікі Беларусь да “Зялёнай эканомікі”, які фінансуецца Еўрапейскім саюзам у рамках рэалізацыі праграмы развіцця ААН. Грошы, а гэта 200 тысяч еўра, што атрыманы прадпрыемствам выкарыстоўваюцца на набыццё дадатковага абсталявання, каб палепшыць дзейнасць па здабычы сапрапелю. Акрамя гэтага дырэктар Віктар Атліванаў плануе ў бліжэйшыя гады стварыць у адной з самых маляўнічых мясцін Беларускага Палесся, на возеры Чырвонае, цудоўную зону для адпачынку: з рыбалкай, са зборам буякоў і іншымі выгодамі і радасцямі сельскага ўкладу жыцця. Вось так па-гаспадарску падыходзяць да бязмежнага багацця возера Чырвонае ў ААТ “Жыткавічыхімсервіс” І па сведчаннях спецыялістаў хопіць яго яшчэ на многія стагоддзі.

Наша даведка:
У адной тоне сапрапелю з возера Чырвонае ўтрымліваецца 3 працэнты калію, 2 – азоту і 1 працэнт фосфару. Пры ўнясенні на адзін гектар яго пяцьдзесят тон поўнасцю можна забяспечыць патрэбы сельгаскультур у пажыўных рэчывах. Акрамя гэтага пры выкарыстанні сапрапелю ў якасці ўгнаення значна павялічваецца ўтрыманне ў глебе гумусу.
Донныя адкладанні, здабытыя ў возеры Чырвонае, утрымліваюць амаль 20 працэнтаў пратэіну, што дае магчымасць прымяняць іх у якасці высокаэфектыўнай дабаўкі пры вытворчасці камбікармоў.

здабыча сапрапелю спецыялістамі ААТ “Жыткавічыхімсервіс” на возеры Чырвонае распачата ў 1975 годзе. За гэты час са дна вадаёма намыта гэтага каштоўнага прадукту адзін мільён дзвесце тон. Па ацэнцы спецыялістаў запасы сапрапелю складаюць больш за семдзясят мільёнаў тон.
Сяргей Белка.

Добавить комментарий

Ваш e-mail не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.