#Разам Супольнасць пакаленняў

Напярэдадні новага дзяржаўнага свята – Дня народнага адзінства – ў Жыткавічах заклалі алею “Дружба”.

Месца для яе вызначана невыпадковае — ў маладым мікрараёне №10, які новымі шматпавярхоўкамі падаўжае горад на поўдзень. Для пасадкі сімвалічна выбралі 39 дрэўцаў, атаясамляючы іх колькасць з годам мінулага стагоддзя, калі аб’ядналіся Заходняя і Ўсходняя часткі Беларусі. І пароды таксама з сэнсам – беластволыя бярозкі ды рабіны. Восенню такая палітра будзе выглядаць у колерах нашага нацыянальнага сцяга.

Акцыя сабрала людзей розных узростаў, прадстаўнікоў улады, грамадскіх арганізацый, працоўных калектываў, моладзь.

— Гэта добры падарунак да свята,— лічыць дзесяцікласніца СШ №3, сакратар пярвічкі БРСМ Валерыя Гулюта. — Хочацца, каб Жыткавічы і далей прыгажэлі.

— Пасадзіць дрэва – значыць пакінуць на зямлі добры след, — дадае Віктар Маркевіч, вадзіцель ветлячэбніцы. – На маім рахунку ўжо набярэцца цэлы гай, няхай і сёняшнія растуць-дужэюць.

Падобныя мерапрыемствы гуртуюць людзей, мацуючы сувязь пакаленняў і прымнажаючы традыцыі. Вось і новая “Дружба” захавае памяць пра адзначанае ўпершыню свята.

Святлана Шакалян

Добавить комментарий

Ваш e-mail не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.