Прэмія за добрыя веды
11-класніца Мілевіцкага дзіцячага сада- сярэдняй школы Вікторыя Басарановіч стала стыпендыяткай прэміі аблвыканкама. Штогод такой узнагароды ўдастойваюцца лепшыя вучні Гомельшчыны за высокія вынікі ў інтэлектуальнай і грамадскай дзейнасці.
Прадстаўніца нашага раёна неаднаразова ўдзельнічала ў розных творчых спаборніцтвах. Летась, напрыклад, яна стала прызёрам абласнога конкурсу чытальнікаў, прысвечанага 90-годдзю беларускіх класікаў Івана Мележа і Івана Шамякіна “Захаваем свет разам”. На рахунку Вікторыі і перамогі ў прадметных алімпіядах па беларускай мове і літаратуры.
Удзел ва ўрачыстай цырымоніі ўзнагароджвання, што прайшла ў Гомелі 21 снежня, натхніў вучаніцу на далейшае самаўдасканаленне, авалоданне ведамі.
Дарэчы, праз месяц В. Басарановіч у ліку іншых вучняў раёна будзе ўдзельнічаць у абласной алімпіядзе па роднай мове.