Юрый Ахрамовіч: «Па сілах самыя складаныя задачы»

Юрый Ахрамовіч  дарогу свайго жыццёвага лёсу вызначыў даволі немудрагеліста, але ёмка.

Аснова гэтага прынцыпу: работа па душы і надзейны сямейны тыл. Менавіта такая канцэпцыя дазволіла Юрыю Аляксандравічу дабіцца немалых поспехаў.

Разуменню, што нічога ў рукі само не прыходзіць, Юрыя вучылі бацькі. Дарэчы, паважаныя людзі ў нашым раёне, якія зрабілі нямала дзеля яго працвітання. Калі служыў у органах унутраных спраў, мужчына заўсёды кіраваўся карыснай парадай. Пасля выхаду ў адстаўку вырашыў прыкласці свае веды і навыкі ў цывільнай справе. Дзесяць гадоў назад такое жаданне прывяло яго ў Жыткавіцкае прадпрыемства меліярацыйных сістэм. Там Юрый Аляксандравіч заняў пасаду інжынера па ахове працы.

– Не шкадую што трапіў у гэты калектыў, – гаворыць Юрый Ахрамовіч. – паважлівыя адносіны адзін да аднаго, добразычлівасць, узаемавыручка, прафесіяналізм – гэта няпоўны пералік станоўчых якасцей, якія ўласцівы работнікам ПМС. Таму і вопыту набірацца ў такой атмасферы было надзвычай лёгка. Тым больш і кіраўнік арганізацыі Віктар Палуянаў заўсёды падтрымлівае разумныя ініцыятывы і аказвае ўсебаковую падтрымку пры іх рэалізацыі.

Хутка ў важнай сферы дзейнасці атрымалі і станоўчыя вынікі. Значна павысіліся бяспека работнікаў на вытворчасці і кантроль за захаваннем правілаў аховы працы, стварылі для людзей належныя бытавыя ўмовы, вырашылі іншыя пытанні. І за кожнай справай  стаяў Ахрамовіч. Дарэчы, ён не толькі дасведчаны на сваім участку, але і актыўны ў грамадскім жыцці прадпрыемства. Вельмі шмат робіць, каб далучыць работнікаў да здаровага ладу жыцця. У ПМС для гэтых мэт нават абсталявалі ўласную спартыўную залу, дзе цяпер пастаянна праводзяцца спаборніцтвы.

– Канечне, усё адбываецца не без падтрымкі кіраўніцтва, – расказвае Юрый Аляксандравіч, – такое ўзаемадзеянне толькі на карысць, бо дазваляе дабіцца больш цеснага кантакту паміж працаўнікамі, што спрыяе выніковай рабоце на вытворчасці.

Службовая дзейнасць Ахрамовіча не аднойчы  заахвочвалася адміні-страцыяй, а яго сумленныя адносіны да працы ставяцца ў прыклад іншым. І тое, што імя спецыяліста занесена на Дошку гонару прадпрыемства, з’яўляецца яшчэ адным пераканаўчым доказам – чалавек на сваім месцы і робіць усё з душою.

Сяргей Белка

 

 

 

 

 

 

Добавить комментарий

Ваш e-mail не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.