Святкаваў пасёлак

Да першай нядзелі верасня штогод загаддзя з вялікай адказнасцю рыхтуюцца работнікі адкрытага акцыянернага таварыства “Жыткавіцкі торфабрыкетны завод”, паколькі ў гэты дзень адзначаецца свята працаўнікоў нафтавай, газавай і паліўнай прамысловасці. Да таго ж па даўняй добрай традыцыі ў населенным пункце Чырвонае яно заўсёды становіцца святам усяго пасёлка.

 Не стала выключэннем і нядаўняе чарговае свята: прыўзнятая атмасфера панавала ў кожнай кватэры, кожным двары. У мясцовым доме культуры торфабрыкетчыкаў з іх прафесійным святам павіншавалі дырэткар ААТ “Жыткавіцкі торфабрыкетны завод” Міхаіл Малочка, намеснік старшыні райвыканкама Сяргей Таболіч, другія выступоўцы. Былі зачытаны віншаванні ад канцэрна, іншых прадпрыемстваў.

Цікавую, змястоўную праграму жыхарам і гасцям пасёлка прапанавалі самадзейныя артысты Драгічынскага Дома культуры Брэсцкай вобласці. Былі наладжаны таксама забаўляльная праграма і спартыўныя мерапрыемствы.

Адчувальную спонсарскую дапамогу для правядзення свята аказаў дырэктар унітарнага прадпрыемства “Рытм-будсервіс” Віктар Шэйка.