Маленства цёплы ўспамін
Якія самыя яркія моманты свайго дзяцінства прыходзяць сёння на памяць жыхарам раёна розных пакаленняў?
Аб гэтым карэспандэнт «НП» і папрасіў іх прыгадаць.
Алег Старажэнка, г. Жыткавічы:
— Напэўна самым шчаслівым часам стала лета, калі мне было гадоў тры-чатыры. Тады я адпачываў у бабулі і дзядулі. Іх бязмежная любоў да ўнука і зараз сагравае душу. Успамінаюцца не толькі кружка сырадою, якім пастаянна частавала бабуля, а найбольш паездкі з дзедам, які з’яўляўся Георгіеўскім кавалерам, на кані па розных гаспадарчых справах. Для малога гэта была найвялікшая радасць і уцеха.
Таццяна Маркевіч, агр. Азяраны:
— Маленства – гэта такая пара, калі яркіх момантаў безліч. Гэтыя гады заўсёды ўспамінаеш з замілаваннем і цеплынёй. Але і зараз не магу забыцца на падарунак, які ў чацвёртым класе зрабілі бабуля з дзядулем. Мне, дзяўчынцы, яны купілі прыгожыя туфелькі на абцасах. Ох, як ганарылася такім набыткам! Адчуваеш сябе малой, а ў цябе ўжо маецца рэч як у дарослай. Прычым толькі ў адной. На зайздрасць сяброўкам.
Яўген Піскун, агр. Азёрны:
— О, дзяцінства! Так, дзядуля з бабуляй, школа, рыбалка… Але гэта, напэўна, ва ўсіх было. Ага! Вось тое, як упершыню на навагоднім ранішніку сыграў сваю ролю, і дагэтуль не забуду. Нас з братам нарадзілі ў касцюмы зайчыкаў, і мы весялілі дарослых і дзяцей, якія сабраліся ў мясцовай установе культуры з усяго пасёлка рыбаводаў. Як пасля намі ганарыліся бацькі. Дарэчы, у пэўнай ступені гэта паўплывала і на мой прафесійны выбар.
Ларыса Сінгаеўская, агр. Дуброва:
— У мяне самых шчаслівых момантаў у маленстве было аж дзевяць. Кожны з іх звязаны з нараджэннем у нашай сям’і малодшых брацікаў ці сястрычак. Я была старэйшай, таму дапамагала маці іх гадаваць. Вельмі падабалася бавіць час з малымі: ладзіць з імі гульні, гатаваць для іх ежу, карміць, гушкаць немаўлят у калысцы і спяваць калыханкі. Цяпер я сама шматдзетная маці і радуюся кожнаму поспеху сваіх дзяцей і ўнукаў.
Сяргей БЕЛКА