Свае першыя прафесійныя крокі ў ВУ “Жыткавічыгаз” Віктар Саўчыц зрабіў дваццаць тры гады назад
Цяпер гэта паважаны і спрактыкаваны спецыяліст, які валодае некалькімі прафесіямі і здольны выконваць самыя складаныя задачы.
Віктар Іванавіч палюбіў сваю працу адразу, як толькі ўладкаваўся на прадпрыемства трактарыстам. Пастаянна з добрым настроем ён пачынаў рабочы дзень. Хаця перад тым да месца працы адмахваў на веласіпедзе з Хісцецкага Бору больш як дзясятак кіламетраў. Такі жыццёвы рытм захаваўся і дагэтуль. Праўда, як прызнаецца спецыяліст, цяпер ездзіць у Жыткавічы з Сяменчы ўласным аўтамабілем.
— Зарабляць жа на жыццё недзе трэба, а ў нашай арганізацыі для гэтага створаны ўсе магчымасці. Таму і даражу работай, ды і калектыў падабраўся добры. Даўно знітаваўся з ім, пакідаць не збіраюся, — гаворыць Віктар Саўчыц.
Вытворчая неабходнасць дала магчымасць мужчыне перакваліфікавацца з трактарыста ў слесары. На гэтай пасадзе не адну дарогу скалясіў у раёне, дастаўляючы па вёсках балоны з газам. Напэўна тады і прыйшло жаданне самому сесці за руль аўтамабіля. І ён гэта зрабіў. Цяпер Віктар Іванавіч сам дастаўляе калег па вызначаных адрасах. У асноўным гэта гаспадары сядзіб, якім імкнуцца падвесці прыродны газ. Менавіта ўстаноўкай спецыяльнага абсталявання, яго падключэннем і займаецца брыгада, якую прывозіць Віктар Іванавіч. Не сядзіць і сам без справы, дапамагае таварышам манціраваць газавае абсталяванне.
— Навык ёсць, чаму і не папрацаваць, — расказвае спецыяліст. — Тым больш што сумесна хутчэй усё атрымліваецца і зручней. А гаспадары такі расклад толькі вітаюць.
Самааддача Саўчыца падмацавана мноствам узнагарод, якімі адзначыла яго старанні кіраўніцтва ўпраўлення. А яшчэ ён — пераможца і прызёр конкурсаў прафесійнага майстэрства, што таксама яскрава сведчыць, наколькі гэты руплівец адданы абранай справе.