Дзедаўскі занятак
Аляксандр Касцюк у Беразіне не толькі з’яўляецца даверанай асобай старшыні Людзяневіцкага сельвыканкама, але і адмысловым пчаляром.
Яго падворак знайсці няцяжка. З вуліцы бачныя некалькі дзясяткаў вулляў, што пастаўлены сярод разнастайных архітэктурных формаў на агародзе. А па перыметру сядзібы прымасціліся борці. З дзясятак іх яшчэ маецца ў лесе. Сваёй гаспадаркай Аляксандр Пятровіч вельмі даражыць і ганарыцца.
– Вось мая першая калода, – падводзіць пчаляр да таўшчэзнага сасновага камля. – Яшчэ дзедаўская. Ён быў даволі дужым чалавекам, сам прыкачаў яе за некалькі кіламетраў з лесу, а потым назад туды даставіў і адзін устанавіў на дрэве. Борць і цяпер служыць спраўна.
Свой першы мёд Касцюк атрымаў яшчэ ў шасцігадовым узросце. З таго часу і не пакідае пчалярскай справы. Больш таго, як чалавек творчы імкнецца рабіць вуллі такімі, каб яны не толькі падабаліся пчолам, але і людзям.
Увогуле Аляксандр Пятровіч стараецца быць аднавяскоўцам прыкладам ва ўсім. Ён праяўляе сябе і як дбайны гаспадар, і грамадскі актывіст, і культработнік. Адным словам, чалавек паважаны і сапраўдны лідар, які гатовы прыйсці на дапамогу іншым у вырашэнні надзённых праблем.